Претседателката Гордана Сиљановска-Давкова започнува официјална посета на Република Хрватска. Во текот на нејзиниот престој, таа ќе биде пречекана со највисоки државни и воени почести од страна на претседателот на Република Хрватска, Зоран Милановиќ.
Предвидено е да се одржи тет-а-тет средба меѓу двајцата претседатели, по што ќе следува пленарен состанок на македонската и хрватската делегација. Според најавата од Кабинетот на македонската претседателка, таа ќе има средба и со претседателот на владата, Андреј Пленковиќ.
Во рамките на посетата, претседателката Сиљановска-Давкова ќе положи венец на Споменикот на татковината, а исто така ќе положи венец на спомен-бистата на Блаже Конески во градскиот парк „Бундек“.
Сиљановска-Давкова ќе ја посети Македонската православна црква „Св. Злата Мегленска“ во Загреб и ќе оствари средба со претставници на македонската заедница во Хрватска. Во македонскиот Културно-информативен центар во Загреб, претседателката ќе присуствува на отворањето на изложбата „Архивски документи“ на македонската уметница Жанета Вангели.
Во среда, претседателката Сиљановска-Давкова ќе одржи предавање на Правниот факултет при Универзитетот во Загреб на тема „За парадоксите на македонските евроинтеграции“.