Во регионалното Државно средно училиште „Коле Нехтенин“ во Штип, наскоро ќе биде основана училишна реална компанија. Директорката на училиштето, Јованка Шалева, најави дека оваа компанија ќе функционира како посебен правен субјект, кој ќе генерира приход за училиштето и ќе им помага на локалните компании преку извршување на работни задачи за нив.
Шалева истакна дека иницијативата е од големо значење за училиштето и учениците, особено за оние кои се образуваат во областа на електромашинската и угостителската струка. Во моментов, училиштето работи на правната трансформација и валидација на проектот.
"Ни требаше малку подолг период за да ја завршиме правната трансформација на училиштето, но сега сме насочени кон целите на регионалниот центар. Извршивме функционални анализи и сега сме во процес на валидација за отворање на училишната реална компанија. Тоа значи дека училиштето ќе создаде сопствена компанија која ќе остварува посебен приход и ќе понуди свои услуги на компаниите, со цел да им помогне и да извршува работни задачи за нив," изјави Шалева.
Таа додаде дека сите активности се во почетна фаза, но се очекува компанијата да започне со работа оваа есен, следејќи ги успешните примери од другите региони.
ДСУ „Коле Нехтенин“ во Штип е веќе познат како Регионален центар за средно стручно образование и е еден од осумте такви центри во државата.
