Либанското Министерство за здравство објави дека бројот на загинати во израелските напади, кои започнаа на 2 март, официјално ја надмина бројката од 1.000 лица, додека борбите на југот на земјата дополнително се интензивираат.
Според последниот извештај на Центарот за вонредни операции, во изминатите 24 часа загинале 33 лица, што го зголеми вкупниот број на жртви на 1.001 загинато лице и 2.584 ранети. Меѓу настраданите од почетокот на конфликтот, 40 се здравствени работници.
Во исто време, Хезболах објави дека води жестоки битки со израелските копнени сили во градовите Тајбех и Кијам, тврдејќи дека нивните борци успешно одбиле обиди за напредување и дека со ракети и артилерија ги таргетирале израелските тенкови Меркава, како и градови во северниот дел на Израел.
Либански безбедносни извори за ДПА потврдија дека израелската војска полека напредува во селото Кијам, систематски уништувајќи куќи во близина на границата. Израел претходно ги предупреди жителите јужно од реката Захрани да се евакуираат поради нивна безбедност.
Во Бејрут денеска се чувствуваше тензичен мир по вчерашните напади врз централните квартови, во кои загинаа најмалку 12 лица.